मोखाडा तालुक्यातील पिंपळपाडा ते घानवळ रस्त्याची प्रचंड दुरावस्था…
जोहार इंडिया 24 न्यूज
मोखाडा ग्रामीण प्रतिनिधी.
मोखाडा – मोखाडा तालुक्यातील पिंपळपाडा ते घानवळच्या दरम्यानच्या रस्त्याची प्रचंड दुरावस्था झाली असून रस्त्यावरील डांबराचा थरच गायब झालेला आहे. त्यामुळे दोन किलोमीटरच्या घाट रस्त्यावरील नागमोडी वळणे अत्यंत धोकादायक बनली आहेत.
राज्य महामार्ग डहाणू – नाशिक च्या मोखाडा तालुक्यातील पोशेरा आणि मोरचोंडी पासून फाटा फुटून हा रस्ता पालघर व नाशिक जिल्ह्याला जोडणारा प्रमुख मार्ग आहे. तसेच मोखाडावासियांना हरसूल आणि पेठ या प्रमुख बाजारपेठांना देखील जोडणारा अत्यंत जवळचा आणि प्रमुख मार्ग आहे.त्यामुळे या रस्त्याला मोठया प्रमाणात वाहनांची वर्दळ असते. मात्र पिंपळपाडा ते घानवळ जवळील जांभूळमाथा फाट्यापर्यंतच्या या दोन किलोमीटरच्या घाट रस्त्यांची अत्यंत दुरावस्था झाली असून त्यामुळे वाहनचालकांना नाहक त्रास सहन करावा लागत आहे. तसेच अनेक दुचाकीस्वारांचे अपघात देखील घडत आहेत.
या दुरावास्था झालेल्या रस्त्याकडे प्रशासन आणि लोकप्रतिनिधी कधी लक्ष देतील असा प्रश्न या रस्त्याने प्रवास करणाऱ्या सर्वसामान्य नागरिकांना पडलेला आहे.
या रस्त्याने मूलभूत सोयींसाठी असणारी महाराष्ट्र राज्य परिवहन महामंडळाची बस, रेशनच्या शिधा वाटापाची गाडी आणि रुग्णवाहिका अशा वाहनांची नेहमीच ये – जा असते.त्यामुळे हा रस्ता तात्काळ दुरुस्त करावा अशी मागणी प्रवासी,वाहचालक व सर्वसामान्य नागरिक करीत आहेत.
Total Users : 10829