घानवळ गावातील तरुणांच्या अथक परीश्रमांना अखेर यश… बातमीची दखल !सुरू झाली मोखाडा – घानवळ बस…
जोहार इंडिया 24 न्यूज – मोखाडा ग्रामीण
मोखाडा ग्रामीण – मोखाडा – घानवळ बस पिंपळपाडा ते घानवळ रस्त्याच्या प्रचंड दुरावस्थेमुळे गेल्या पावसाळाभर बंद होती. या रस्त्यावर मोठ- मोठे खड्डे पडले होते तसेच डांबराचा थर वाहून गेला होता. त्यामुळे मोखाडा सार्वजनिक बांधकाम उपविभाग – मोखाडा यांच्याकडून रस्ता वाहतुकीसाठी योग्य नसल्याचा पत्रव्यवहार ग्रामस्थांना केला होता.
गेला पावसाळा भर बस बंद असल्यामुळे घानवळ,जांभूळमाथा बलद्याचापाडा आणि रुईपाडा येथील अबाल – वृद्ध, आजारी व्यक्ती आणि विद्यार्थी यांची बस अभावी तालुक्याच्या ठिकाणी जाताना जाऊन येऊन सहा किलोमीटरची पायपीट करावी लागत होती. परिणामी प्रवाशांना प्रचंड गैरसोयीचा सामना करावा लागत होता.
सर्व सामान्यांची गैरसोय थांबावी आणि अबाल- वृद्ध,आजारी व्यक्ती आणि विद्यार्थी सोयीसाठी घानवळचे सचिन वझरे, नवोदित कमी – हेमंत वारघडे, निवृत्ती भांगरे, कृष्णा राबडे,रोशन गाडर, अमृत शिंपी, नामदेव खरपडे हे तरुण पावसाळाभर पिंपळपाडा ते घानवळ रस्त्यावरील खड्डे सातत्याने श्रमदान करून बुजवत होते. अखेर त्यांच्या या अथक परिश्रमांना यश आले असून जव्हार आगाराच्या प्रमुखांनी मोखाडा – घानवळ बस सुरू केली आहे. ही बस सुरू झाल्यामुळे सर्वसामान्यांना दिलासा मिळाला असून त्यांच्या चेहऱ्यावर समाधान दिसून येत आहे. श्रमदानाने खड्डे बुजवणाऱ्या तरुणांचे सामाजिक स्तरातून विशेष कौतुक होत आहे. भविष्यात प्रशासन आणि लोकप्रतिनिधी यांनी या प्रचंड दुरावस्था झालेला रस्ता तात्काळ नवीन बनवून सर्वसामान्यांना दिलासा द्यावा इतकीच माफक अपेक्षा. आता हा रस्ता येणाऱ्या काळात कधी नवीन डांबरीकरणाचा बनवला जातो हे पाहणे महत्त्वाचे ठरणार आहे.
Total Users : 10829