जोहार इंडिया 24 न्यूज . इन ./पालघर जिल्हा प्रतिनिधि :रामदास गाडर .
पालघर जिल्ह्यातही पावसाने दमदार हजेरी लावली. त्यामुळे शेतकरी राजा सुखावला असून प्रचंड उकाड्याचा सामना करणाऱ्या नागरिकांनाही सुखद गारवा अनुभव आला .
सोमवारी सकाळपासून पावसाने जिल्ह्यात दमदार हजेरी लावली. परिणामी नोकरीवर जाणाऱ्या चाकरमान्यांची तारांबळ उडाली. पालघर जिल्ह्यातील डहाणू, बोईसर, पालघर, सफाळे, वसई-विरार शहरासह जिल्ह्याच्या ग्रामीण भागात समाधानकारक पाऊस बरसत आहे. जून महिन्याचा पंधरवडा उलटूनही पावसाने पाठ फिरवल्याने शेतकरी हवालदिल झाले होते. भातशेतीची कामे खोळंबली होती. शिवाय पाणीटंचाईचे सावट देखील जिल्ह्यात होते; परंतु मान्सून सक्रिय झाल्याने सर्वांनीच सुटकेचा निःश्‍वास टाकला आहे.
पालघर जिल्ह्यातील आपत्कालीन कक्ष सज्ज झाला आहे. दुर्घटना घडू नये, पावसाचे पाणी साचून जनजीवन विस्कळित झाल्यास नागरिकांचे स्थलांतर करता यावे यासाठी यंत्रणा तैनात ठेवण्यात आली आहे. त्याचबरोबर प्रत्येक तालुक्यात नियंत्रण कक्षाची उभारणी करण्यात आली आहे. दरम्यान, वीज अंगावर पडून सावरे ग्रामपंचायत हद्दीत ११ वर्षीय मुलाचा मृत्यू झाला. त्यामुळे नागरिकांनी विजेपासून सावध राहण्याचा इशारा पालघर जिल्हा प्रशासनाने दिला आहे. वीज कोसळून जीवितहानी होऊ नये याकरिता केंद्र सरकारने निर्मित केलेल्या ‘दामिनी ॲप’चा वापर नागरिकांनी करावा, असे आवाहन पालघर जिल्हाधिकारी डॉ. माणिक गुरसळ यांनी केले आहे.
Total Users : 10828